Lìonanaich mara / Marine algae

Gheibhear air na cladaichean againn buidheann lusan cho sean 's a th' air a' phlanaid agus iad a' fàs cho math 's a ghabhas. Canaidh sinne lìonanaich mara riutha ach 's dòcha gum b' fhèarr leat fhèin feamainn a ghabhail orra. Chan eil mòran àrainnean air an t-saoghal cho garbh ri cladach. Bidh stoirmean a' gabhail dha, no bidh an làn a' fàgail gach nì beò gus bruich sa ghrèin, gus tioramachadh sa ghaoith no bidh ìre an t-sàil ag atharrachadh gu luath. Cha chanadh tu gum biodh e freagarrach do lus phrìomhadail. Ach tha lìonanaich mara a' lìonadh gach còs air an tig am muir tarsainn, agus tha iad nan àrainn agus nam biadh, do mhòran dhe na h-ainmhidhean a lorgas sinn air a' chladach. Agus, cuideachd, bidh iad a' sgaoileadh tro mhuir tana mu na cladaichean againn gus an ruig iad an t-àite sa bheil an solas air falbh.

Ceilp

Tha sinn cleachdte ri bhith a' faicinn ceilp air a' chladach. Bidh ceilp a' dèanamh choilltean tiugha fon uisge, agus tha sin ceart cho prìseil do dh'fhiadh-bheatha 's a tha coilltean air tìr.

Feamainn-ghruaige

Chan eil i seo coltach ris a' mhòr-chuid de dh'fheamainnean idir oir chan eil i ceangailte ri creagan. Bidh i a' seòladh air an làn mar luibhean ri gaoith an fhàsaich.

Lus nan clach

Tha 33 gnè de lus nan clach san RA, ach tha iad uabhasach mothachail a thaobh truaillidh, agus, mar thoradh air an sin, tha mòran dhiubh gu math tearc a-nis.

Maerl

'S e feamainn chruaidh àlainn phurpaidh-dhearg a th' ann an maerl bheò agus bidh i a' dèanamh 'bhratan' biorach air grunnd na mara.